ශ්‍රී ලංකා ඉතිහාසයේ එතෙක් මෙතෙක් මුහුණ දුන් දැවැන්තම ඛේදවාචකය වන සුනාමි ව්‍යසනයට අදට (26) වසර හතක් පිරේ. ඉන්දුනීසියාවේ සුමාත්‍රා දූපත් අසළ සාගරයේ සිදු වූ භූ කම්පනයක් නිසා හට ගත් සුනාමි ව්‍යසනයෙන් ලොව පුරා රටවල් 14 කට දැඩි හානි සිදු විය. රිච්ටර් මාපකයේ 8. 9 ඉක්ම වූ කම්පනයක් මෙහිදී වාර්තා විය. සැණෙකින් රළු වූ මහා සාගරය ගොඩ ගලා දහස් සංඛ්‍යාත ජනකායකගේ ජීවිත පමණක් නොව කෝටි ගණනක් වටිනා දේපළ ද සොරා ගත්තේ යළිත් වසර ගණනකට රට ගොඩ නැඟිය නොහැකි වන අන්දමට ය.
ලෝකයේ දියුණු රටවල් පවා සුනාමියෙන් එල්ල වූ තර්ජනය හමුවේ පරාජිතව සිටියදී ධෛර්ය සම්පන්න ශ්‍රී ලාංකිකයෝ කෙටි කලක් තුළ යළිත් නැඟී සිටියහ. එවකට උග්‍ර තත්ත්වයක පැවැති ත්‍රස්තවාදී ගැටලුවත් සමඟ සුනාමියටත් මුහුණ දුන් අප රට යළිත් ගොඩ නොනැෙඟතැයි බලා සිටි ජාත්‍යන්තරයට පැහැදිලි පිළිතුරක් දුන් ශ්‍රී ලංකාව අද සුනාමියේ හත් වැනි සංවත්සරය සමරන්නේ සුනාමියෙන් වූ ව්‍යසනය පමණක් නොව දශක තුනක් පැවැති රුදුරු ත්‍රස්තවාදයත් අකා මකා දැමූ නිදහස් රටක් ලෙසය.
සුනාමියෙන් අහිමි වූ ජීවිත හැර අනෙකුත් සියලු දේ මේ වන විට ගොඩ නැගීමට ජාතියක් වශයෙන් අප සමත්ව වුණේ ජනාධිපති මහින්ද රාජපක්ෂ මහතාගේ දූරදර්ශී නායකත්වය හා මඟ පෙන්වීම මත බව නොරහසකි. සුනාමි ව්‍යසනය සිදු වන අවස්ථාවේදී එවකට සිටි රාජ්‍ය නායිකාව රටේ නොසිටි අතර එවකට අගමැතිවරයාව සිටි වත්මන් ජනාධිපතිවරයා වහා මැදිහත්ව විපතට පත් වූවන්ට සහන සැලැසීමට කටයුතු කළේය. සුනාමිය නිසා පළාත් හතරකට අයත් දිස්ත්‍රික්ක 13ක් ආපදාවට ලක්විය. ගාල්ල, මාතර, හම්බන්තොට, කළුතර, කොළඹ, ගම්පහ, අම්පාර, මඩකළපුව, ත්‍රිකුණාමලය, යාපනය, කිලිනොච්චිය, මුලතිව් හා පුත්තලම දිස්ත්‍රික්ක මෙසේ ආපදාවට ලක්විය.
අප රටේ 31000 ඉක්ම වූ ජීවිත සංඛ්‍යාවක් සුනාමියෙන් අහිමි වූ අතර 4093ක් අතුරුදන්ව තවත් 23000කට පමණ තුවාල සිදු විය. ලක්ෂ පහකට ආසන්න සංඛ්‍යාවක් අවතැන් වූවන් බවට පත් කළ සුනාමි රකුසා නිවාස 63447ක් සම්පූර්ණයෙන් විනාශ කර දැම්මේය. අර්ධ හානි සිදු වූ ඬවාස සංඛ්‍යාව 43,000 ඉක්මවයි. සංචාරක හෝටල් 144ක් විනාශ විය. ආගමික සිද්ධස්ථාන 396ක්, පාසල් 73ක් රෝහල් හා සෞඛ්‍ය මධ්‍යස්ථාන 9 ක් සම්පූර්ණයෙන් විනාශ වූ අතර තවත් පාසල් 109ක් රෝහල් 18ක් අර්ධ වශයෙන් විනාශ විය. දෙසැම්බර් 26 වැනිදා උදේ කොළඹ සිට මාතර බලා ධාවනය වූ අංක 50 දරන දුම්රිය තෙල්වත්ත ප්‍රදේශයේදී සුනාමියට බිලි වූ අතර එහි ගමන් කළ මඟීන් දහසකට ආසන්න ප්‍රමාණයකගේ ජීවිත අහිමි විය.
0 comments:
Post a Comment